లెమ్ము! యేసులో పరలోక తండ్రిని చూడు:: యెహోషువ 5:9a.10-12; 2 కొరింథీ 5:17-21; లూకా 15:1-3.11-32 (Lent 4/C)

 

లెమ్ము! యేసులో పరలోక తండ్రిని చూడు

యెహోషువ 5:9a.10-12; 2 కొరింథీ 5:17-21; లూకా 15:1-3.11-32  (Lent 4/C)

“దేవునికి భయపడేవారందరూ వచ్చి వినండి. ఆయన నా ఆత్మ కోసం ఏమి చేసాడో నేను చెబుతాను” (Divine Office)

 

ఈ ఆదివారమును “లేతరే” ఆదివారంగా పిలుస్తుంది మాతృ శ్రీసభ. లతీను పదం  “లేతరే” అంటే “సంతోషించు” అని అర్ధం. ఈ లెంట్ నాల్గవ ఆదివారపు అర్చన “తప్పిపోయిన కుమారుని’ ఉపమానమును ధ్యానిస్తుంది. దీనితోపాటు ఇంకా రెండు ఉపమానాలు నేటి సువార్తలో కన్పిస్తాయి. ఈ మూడు ఉపమానాలను “తప్పిపోయిన” అను శీర్షికన ఉపమానాలుగా పిలుస్తాడు లూకా గ్రంథ కర్త. మొదటి ఉపమానం తప్పిపోయిన గొర్రె దయనీయమైన మూర్ఖత్వాన్ని వర్ణిస్తుంది. రెండవ ఉపమానం తప్పిపోయిన నాణెపు దౌర్భాగ్య స్వీయ-అధోకరణాన్ని చిత్రీకరిస్తుంది. ఇక మూడవది కృతజ్ఞత లేని దుడుకు తనమును చూపుతుంది. తప్పిపోయిన దానిని తిరిగి దేవుడు కనుగొన్నాడు. అందుచేతనే తిరుసభ ఈ ఆదివారమును “లేతేరే” లేదా “సంతోషించు” ఆదివారంగా కొనియాడుతుంది.

తప్పిపోయిన కుమారుని ఉపమానంలో మూడు పాత్రదారులు వున్నారు. మొదటగా, పెద్ద కుమారుడు. వ్యసనాలకులోనై పశ్చత్తాపం చెంది  ఇంటికి తిరిగి వచ్చిన తమ్ముడిని చూచి సంతోషించక బాధపడిన కుమారుడు. అతను స్వనీతిమంతుడైన పరిసయ్యులను సూచిస్తున్నాడు. పరిసయ్యులు, ఒక పాపి రక్షించబడటం కంటే తాను నాశనం చేయబడటం చూడటానికే ఎక్కువ ఇష్టపడతారు. అలాగునే తన తండ్రికి విధేయత చూపినవాడుగానూ, సంవత్సరాల తరపడిన  కాలమంతా ప్రేమపూర్వక సేవతో కాకుండా కఠినమైన విధితో నిండి వున్నట్లుగా  అతని వైఖరి చూపిస్తుంది. అతనికి సానుభూతి లేదు. అతను ఆ తప్పిపోయిన కుమారుడిని 'తన సోదరుడు' అని కాకుండా 'నీ కుమారుడు' అని సంబోధించాడు. సంతోషించక అసూయ నైతికతన దిగజారిపోయినప్పుడు, నిజానికి తనే స్వార్థపరుడు. చిన్నావాడు కాదు. తన సోదరుడు చేయలేని పాపము “వేశ్య” అనే పదం వాడి ఆ పాపమును తనకు అంటగట్టాడు. నిందలు వేయడం పరిశుద్ధ గ్రంథ భాషలో మహా చావైన పాపం!

రెండవది, తండ్రి. పాపం వల్ల నాశనమైన కుమారుడు తిరిగి రావడంతో తన తిరుగు రాక కొరకు వేచి యున్న తండ్రి లేచి ఎదురు వెళ్ళాడు. అది క్రీస్తు ముఖంలో ప్రతిబింబించే మన పరలోక తండ్రి వైఖరికి చిహ్నం: “అతను ఇంకా చాలా దూరంలో ఉన్నప్పుడు, అతని తండ్రి అతన్ని చూసి కరుణతో నిండిపోయాడు. అతను తన కుమారుని దగ్గరకు పరిగెత్తుకుంటూ వెళ్లి, అతన్ని కౌగిలించుకుని ముద్దు పెట్టుకున్నాడు” (లూకా 15:20). ఎటువంటి  అత్యంత పాపి అయినా, దేవునికి చాలా ముఖ్యమైనవాడని, అతన్ని ఏ విధంగానూ కోల్పోకూడదని యేసు మనకు నేర్పిస్తున్నాడు. తండ్రి దేవుడు వర్ణించలేని ఆనందంతో ఉన్నాడు.  తన కుమారుని ప్రాణాన్ని కూడా లెక్కించకుండా ఎల్లప్పుడూ క్షమాపణ ఇవ్వడానికి సిద్ధంగా ఉన్నాడు.

మూడవది, చిన్న కుమారుడు. నిజమే. అతను స్వార్థపరుడే! స్వార్థం అనే మూలం నుండి ఇంద్రియాలకు సంబంధించిన పాపాలు మరియు అధిక గర్వం పెరుగుతాయి. ఆ స్థితి శాశ్వత అసంతృప్తి, నిష్క్రమణ మరియు దేవుని నుండి దూరాన్ని పెంచే దీన హీన  స్థితి. ఇది ఒక నీచమైన, దాస్య స్థితి. లోకానికి లేదా శరీరానికి దుఃఖంగా మార్చబడిన ఆత్మ, తన తత్వాన్ని  వృధా చేసుకుంటుంది మరియు అల్లరిగా అల్లకొల్లోలంగా జీవిస్తుంది (ప్రసంగి 9:18). దారి తప్పిన ప్రయాణికుడిలా తప్పిపోయినటు వంటిది ఈ దుడుకు ఆత్మ. తప్పిపోయిన కుమారుడు తన పరిస్థితి ఎంత దారుణంగా ఉందో ఆలోచించాడు. అతను ఆకలితో అలమటించాడు. "నేను లేచి నా తండ్రి దగ్గరకు వెళ్తాను" అని చెప్పుకోవడానికి అతను నిశ్చయించుకున్నాడు. నిజమైన పశ్చత్తాపం అనేది ధైర్యంగా తలెత్తి అణకువతో దేవుని వద్దకు తిరిగి వస్తోంది. ఇది తనలో కన్పించే పారదర్శక పరివర్తన. పాపాన్ని ఒప్పుకోవడం అంటే శాంతి మరియు క్షమాపణకు అవసరమైన ఒక షరతు. నిజంగా పశ్చాత్తాపపడేవారు దేవుని ఇల్లు మరియు దాని ఆధిక్యతలకు అధిక విలువను కలిగి ఉంటారు (కీర్తన 84: 4,10).

ఈ దీక్షా రోజుల్లో మనం నేర్చుకొనే పాఠం - పాపపు  సేవలో నశించడానికి సిద్ధంగా ఉన్నట్లు తాము గ్రహించేవరకు పాపులు క్రీస్తు సేవకు రాలేరు. పాపము పాపితో మాట్లాడాలి. పాపి దేవుని హస్తాలలో చిక్కబడాలి. అప్పుడే సంసిద్దత. మనం శరీరానికి రుణగ్రస్తులం కాదు. పాపం నుండి పరివర్తన అంటే ఆత్మను మరణం నుండి జీవానికి చైతన్య పరచడం మరియు కోల్పోయిన దానిని కనుగొనడం. ఇది గొప్ప అద్భుతమైన సంతోషకరమైన మార్పు. ఎందుకంటే కోల్పోయినది కనుగొనబడుతుంది, చనిపోయినది తిరిగి జివింపజేస్తుంది మరియు పనికిరానిది ప్రయోజనకరంగా మార్చబడుతుంది. మరి నీ పరిస్థితి ఏమిటి? నేడు దేవుని హస్తాలలో ఉన్నందుకు ఈ నాటి అర్చన సంతోషాన్ని వాక్య సంతోషాన్ని తనివితీరా పొందుకొని పొరుగువారితో కూడా పంచుకుందాం.

"నీ వాక్యం నా అడుగులకు దీపం, నా మార్గానికి వెలుగు"

 

 

 

 

దేవునితో మానవుని రహస్య కలయిక

 

దేవునితో మానవుని రహస్య కలయిక

మనస్సు ద్వారా వినయం, శక్తి ద్వారా బలహీనత, శాశ్వతత్వం ద్వారా మరణము అనుగ్రహించబడతాయి. బాధను భరించలేని మన అసమర్థ స్వభావం, ఆ పాపపు స్థితి రుణాన్ని తీర్చడానికి, వ్యాకులతను తాళ గలిగే స్వభావంతో జోడించబడింది. అందువలన, మనకు అవసరమైన స్వస్థతకు అనుగుణంగా, దేవునికి మరియు మనుష్యులకు మధ్య ఒకే  మధ్యవర్తి అయిన మానవుడు యేసుక్రీస్తు ఒక స్వభావంలో చనిపోగలిగాడు మరొక స్వభావంలో చనిపోలేకపోయాడు. కాబట్టి నిజమైన దేవుడు నిజమైన మానవుని పూర్తి  పరిపూర్ణ స్వభావంలో జన్మించాడు. తన స్వంత దైవిక స్వభావంలోనూ, పరి పూర్తిగా, మన స్వభావంలో జనించాడు. మన స్వభావం అంటే సృష్టికర్త ప్రారంభం నుండి మనలో ఏమి రూపొందించాడో తిరిగి దానిని పునరుద్ధరించడానికి తనను తాను అదే స్వభావాన్ని తీసుకున్నాడని మనం అర్థం చేసుకుంటున్నాము.

మనిషిని తప్పుదారి పట్టించిన మోసగాడి జాడ రక్షకుడిలో లేదు. అందువలన అతను మన మానవ బలహీనతలో పాలుపంచుకోగలిగాడు. అతను మన పాపాలను తన భుజాన వేసుకున్నాడు. అతను పాపపు  మచ్చ లేని సేవకుడి స్వభావాన్ని తీసుకున్నాడు. తన దైవత్వాన్ని తగ్గించకుండా మన మానవత్వాన్ని హెచ్చించాడు. ఆయన తనను తాను ఖాళీ చేసుకున్నాడు. అదృశ్యతను కలిగి ఉన్నప్పటికీ, తనను తాను మనకు కనిపించేలా చేసుకున్నాడు. అన్నిటికీ సృష్టికర్త ప్రభువు అయినప్పటికీ, ఆయన మర్త్య మానవులలో ఒకరిగా ఉండాలని ఎంచుకున్నాడు. అయినప్పటికీ ఇది కరుణకు కలిగిన దయ. అంతేగాని సర్వశక్తిని కోల్పోవడం కాదు. కాబట్టి దేవుని స్వభావంలో మనిషిని సృష్టించినవాడు సేవకుడి స్వభావంలో మానవుడిగా మారాడు. ఆ విధంగా దేవుని కుమారుడు ఈ నీచమైన లోకంలోకి ప్రవేశించాడు. ఆయన పరలోక సింహాసనం నుండి దిగివచ్చాడు. అయినప్పటికీ తండ్రి మహిమ నుండి తనను తాను వేరు చేసుకోలేదు. ఆయన ఒక కొత్త స్థితిలో కొత్త జన్మ ద్వారా జన్మించాడు.

ఆయన ఒక కొత్త స్థితిలో జన్మించాడు. ఎందుకంటే ఆయన తన స్వభావములో కనిపించకుండా, మన స్వభావములో కనిపించాడు. మన స్థితికి అతీతంగా ఆయన మన స్థితిలోకి రావాలని ఎంచుకున్నాడు. కాలం ప్రారంభం కావడానికి ముందే ఉనికిలో ఉన్నవాడు. ఆయన కాలంలోని ఒక క్షణ కాలం పాటు ఉనికిలోకి రావడం ప్రారంభించాడు. విశ్వ ప్రభువు, ఆయన తన అనంతమైన మహిమను దాచిపెట్టి, సేవకుడి స్వభావాన్ని తీసుకున్నాడు. దేవుడిగా బాధపడటానికి అసమర్థుడు. ఆయన మనిషిగా ఉండటానికి నిరాకరించలేదు, బాధపడటానికి సమర్థుడు. ఆయన అమరుడు మరియు  మరణ నియమాలకు లోబడి ఉండాలని ఎంచుకున్నాడు. నిజమైన దేవుడు కూడా నిజమైన మనిషి. మానవుని అణకువ మరియు దేవుని గొప్పతనం పరస్పర సంబంధంలో కలిసి ఉన్నంత వరకు ఈ ఐక్యతలో అబద్ధం అనేది లేదు.

దేవుడు మారనట్లే, ఎల్లకాలము ఆయన మారని దేవుడు కాబట్టి అతి ఉన్నతంగా మార్చబడిన మానవుడు ఎన్నటికి మోసగాని ఉచ్చులో మ్రింగివేయబడడు. ప్రతీ ప్రకృతి జీవి మరొకదాని సహవాసంలో దాని స్వంత కార్యకలాపాలను నిర్వహిస్తుంది. వాక్కు వాక్యానికి తగినది చేస్తుంది. శరీరం శరీరానికి తగినది నెరవేరుస్తుంది. ఒక స్వభావం అద్భుతాలతో ప్రకాశిస్తుంది. మరొకటి గాయాలకు గురవుతుంది. వాక్కు తండ్రి మహిమతో సమానత్వాన్ని కోల్పోనట్లే, శరీరం మన జాతి స్వభావాన్ని వదిలిపెట్టదు. ఆయన నిజంగా దేవుని కుమారుడు మరియు నిజంగా మనుష్యకుమారుడు. ఆయన ఒకే ఒక్క వ్యక్తి. ఆదిలో వాక్కు  ఉంది. ఆ వాక్కు దేవునితో ఉంది. ఆ వాక్కు దేవుడు అనే వాస్తవం ద్వారా ఆయన దేవుడు. వాక్యం శరీరధారియై మన మధ్య నివసించింది అనే వాస్తవం ద్వారా ఆయన మానవుడు. దీనిని పదే పదే చెప్పాలి.

పునీత లియో ది గ్రేట్ పోపు గారు వ్రాసిన లేఖ నుండి తీసుకోబడినది (Divine Office)

పశ్చాత్తాప అనుకూల సమయం ఇదే: నిర్గమ 3:1-8a,13-15; 1 కొరింథీ 10:1-6,10-12; లూకా 13:1-9 (Lent 3/C)

పశ్చాత్తాప అనుకూల సమయం ఇదే

నిర్గమ 3:1-8a,13-15; 1 కొరింథీ 10:1-6,10-12; లూకా 13:1-9 (Lent 3/C)

“దగ్గరకు రాకండి! మీ పాదాల నుండి చెప్పులు తీయండి, ఎందుకంటే మీరు నిలబడి ఉన్న స్థలం పవిత్ర భూమి”

నేటి లూకా సువార్త పఠనం యేసు యెరూషలేముకు ప్రయాణం చేస్తున్నప్పుడు ఆయన చేసిన బోధన మరియు స్వస్థతను వివరిస్తుంది. లూకా మనకు బంజరు అంజూరపు చెట్టు ఉపమానాన్ని అందిస్తున్నాడు. మార్కు లేదా మత్తయి సువార్తలలో దీనికి సమాంతరం లేదు. పిలాతు 18 మందిని చంపడం గురించి జనసమూహం యేసుకు ఫిర్యాదు చేసినట్లు లూకా నివేదిస్తున్నాడు. సువార్తలో రెండు విపత్తుల గురించి మనం చదువుతున్నాము. వేద పండితుడు విలియం బార్క్లీ వాటి గురించి ఒక కథనాన్ని ఇస్తున్నాడు. అయితే వాటి నిమిత్తమై చారిత్రాత్మక సమాచారం మనకు లేదు కానీ ఉహాగాన మాత్రమె. యెరూషలేములోని ఒక గోపురం ఊహించని విధంగా కూలిపోయిన సంఘటన ఒక ప్రకృతి వైపరీత్యం. యూదులు తరచుగా ప్రకృతి వైపరీత్యాలను మరియు విపత్తులను పాపపు కారణంతో ముడిపెడతారు. పాపం విపత్తుకు దారితీస్తుందని లేఖనం హెచ్చరిస్తుంది! దీనికి నిదర్శనం “నీతిమంతులు ఏడుసార్లు పడిపోయినా, తిరిగి లేచినా; దుష్టులు కీడుచేత నశించిపోవుదురు” (సామె 24:16).

ఈ అవకాశాన్ని ఉపయోగించుకుని యేసు తన అనుచరులను వారి పాపాల నుండి జాగ్రత్తగా ఉండమని హెచ్చరించాడు. యెరూషలేములోని గోపురపు వినాశనానికి బలయిన వారు ఫిర్యాదు చేసిన వారి కంటే ఎక్కువ లేదా తక్కువ పాపులు కారని ఆయన వివరించాడు. ప్రకృతి వైపరీత్యాన్ని పాపానికి ఫలితం శిక్షగా అర్థం చేసుకోకూడదని ఆయన చెప్పాడు. ఊహించని విపత్తు లేదా ఆకస్మిక మరణం మన పాపాల గురించి పశ్చాత్తాపపడటానికి మరియు పరలోక భూలోక న్యాయాధిపతిని కలవడానికి మనల్ని మనం సిద్ధం చేసుకోవడానికి సరిపడినంత సమయం ఇవ్వదని యేసు ఎత్తి చూపిన నిజమైన ప్రమాద మరియు విపత్తు సంఘటన ఇది. దురదృష్టం మరియు విపత్తు నీతిమంతులకు మరియు అనీతిమంతులు ఇద్దరికీ సమానంగా సంభవిస్తుందని యోబు గ్రంథం మనకు గుర్తు చేస్తుంది. మన చర్యలు మరియు నైతిక ఎంపికలకు బాధ్యత వహించాలనీ,  పాపం మన హృదయం, మనస్సు, ఆత్మ శరీరాన్ని కూడా నాశనం చేసే ముందు ఈరోజే దానిని నాశనం చేయమని యేసు స్పష్టమైన హెచ్చరికను మనకు ఇస్తున్నాడు.

యేసు బోధించిన  బంజరు లేదా ఫలించని అంజూరపు చెట్టు ఉపమానం ఇశ్రాయేలు ప్రజల  ఉదాసీనత,  పశ్చాత్తాపం మరియు పునరుద్ధరణ పిలుపుకు ప్రతిస్పందన లేకపోవడం యొక్క ఫలితాన్ని సూచిస్తుంది. దేవుని పట్ల వారి అవిశ్వాసం కారణంగా ఇశ్రాయేలు పతనం మరియు వినాశనాన్ని ప్రవక్తలు క్షీణిస్తున్న అంజూరపు చెట్టుగా చిత్రీకరించారు (యోవేలు 1:7,12; హబ 3:17; యిర్మీ 8:13). యిర్మీయా మంచిచెడు పాలకులను మరియు ఇశ్రాయేలు సభ్యులను మంచి లేదా కుళ్ళిన అంజూరపు పండ్లతో పోల్చాడు (యిర్మీ 24:2-8). యేసు ఉపమానం దేవుని హెచ్చరిక, సహనం మరియు దయను వర్ణిస్తుంది. దేవుడు తన దయతో, మన తప్పులను సరిదిద్దుకోవడానికి సమయం ఇస్తాడు. ఆ పశ్చాత్తాపం చెందడానికి అనుకూల సమయం ఇప్పుడే. మనం ఎల్లప్పుడూ సిద్ధంగా ఉండాలని యేసు మనల్ని హెచ్చరిస్తున్నాడు. పాపపు అలవాట్లను సహించడం వల్ల కలిగే, పశ్చాత్తాపపడని పాపం, బాధాకరమైన వినాశనం, మరణం మరియు విధ్వంసానికి దారితీసే ఆధ్యాత్మిక వ్యాధి తప్పక వస్తుంది. ప్రభువు తన అనంతమైన దయలో మనం పాపం నుండి దూరంగా ఉండటానికి తన కృప మరియు సమయం రెండింటినీ ఇస్తున్నాడు. సమయం ఇదే!

దేవుని సాన్నిధ్య అగ్ని ఎల్లప్పుడూ ఆయన శుద్ధి చేసే ప్రేమ దయలను ప్రదర్శిస్తుంది. అది పాపాన్ని కాల్చివేసి, ఆయన పవిత్రత మరియు నీతిలో మనలను తిరిగి రూపొందిస్తుంది. బంగారాన్ని అగ్నిచే పరీక్షించినట్లే, దేవుడు తాను ప్రేమించే  ప్రజలను పరీక్షించి శుద్ధి చేసి, వారిని తన  పవిత్ర ప్రేమాగ్నితో నింపుతాడు.

 

"క్రీస్తు, సజీవ దేవుని కుమారుడా, మాపై దయ చూపండి"

నమ్మకమైన పోషక సంరక్షకుడు: 2 సమూ 7:4-5a.12-14a.16; రోమ 4:13.16-18; మత్త 1:16.18-21.24a

 

నమ్మకమైన పోషక సంరక్షకుడు

2 సమూ  7:4-5a.12-14a.16; రోమ  4:13.16-18; మత్త 1:16.18-21.24a

“విశ్వాసం మరియు క్రియలు కలిసి పనిచేశాయి. అతను చేసిన దాని ద్వారా అతని విశ్వాసం పరిపూర్ణమైంది” (Divine Office)

ఎవ్వరికి ఎటువంటి ప్రత్యేక కృపలు ఇవ్వబడినప్పటికీ వాటికి సంబంధించి ఒక సాధారణ నియమం ఉంది. ఎవరినైనా దైవానుగ్రహం తన ప్రత్యేక కృపను పొందుకోవడానికి లేదా ఉన్నతమైన ప్రేశిత కార్యమును చేపట్టడానికి అనుగ్రహించి ఎంచుకున్నప్పుడల్లా, దేవుడు ఆ పనిని నెరవేర్చడానికిగానూ అవసరమైనన్ని ఆత్మ బహుమతులతో వారిని అలంకరిస్తాడు.

మన ప్రభువు సాకుడు తండ్రి, పరోలోక భూలోక రాణి సంరక్షక భర్త, మరియు దేవదూతల స్థానాన్నిమించిన సింహాసనాన్ని అధిష్టించినటువంటి పునీత జోజప్పగారి విషయంలో కూడా ఈ సాధారణ నియమం ప్రత్యేకంగా ధృవీకరించబడింది. ఇటువంటి వరానుగ్రహితను మన శాశ్వత పరమ తండ్రి తన గొప్ప సంపదైనటువంటి తన ఏకైక అద్వితీయ కుమారుడు మరియు కన్య మరియకు నమ్మకమైన సంరక్షకుడుగా ఎన్నుకున్నాడు. దేవుడు ఆయనను "మంచి నమ్మకమైన సేవకుడా! మీ ప్రభువు ఆనందంలోకి ప్రవేశించు" అన్న భూలోక అంతిమ క్షణ వర పిలుపు వరకు ఈ  ప్రేశిత ధర్మాన్ని పూర్తి విశ్వాసంతో కొనసాగించాడు యోసేపు.

క్రీస్తు స్థాపిత సంఘంలో యోసేపు స్థానం ఏమిటి? ఆయన దేవాధి దేవునిచే ఎన్నుకోబడి రక్షణ చరిత్రలో ఒక ప్రత్యేక పనిని నెరవేర్చడానికిగానూ ఏర్పాటు చేయబడిన కారణజన్ముడు కాదా? ఆయన సంరక్షణన  క్రీస్తు సముచితంగా గౌరవప్రదంగా లోకంలోనికి ప్రవేశపెట్టబడ్డాడు. అలాగునే పవిత్ర తిరుసభ కన్య మరియ తల్లికి రుణపడి ఉంది. ఎందుకంటే ఆమె ద్వారా క్రీస్తును స్వీకరించడానికి తిరుసభ అర్హమైనదిగా నిర్ణయించబడింది. కానీ ఆమె తర్వాత మనం నిస్సందేహంగా పునీత జోసెఫ్‌ వారికి మాత్రమె  ప్రత్యేక కృతజ్ఞతా గౌరవ వందనాన్ని ఇవ్వడంలో రుణపడి ఉన్నామని మర్చిపోకూడదు.

మరో గమనించదగ్గ విషయం ఏమిటంటే - పాత నిబంధనాల వాగ్ధాన పరిపూర్ణతా మార్గ ముఖతేజస్సు తన కుటుంబ పర్యవేక్షణా విధానంలో ఆయన అనుసరించిన విధానమే! పాత నిబంధనలోని పితృస్వామ్యులు, ప్రవక్తల గొప్ప ప్రవచనాల వాగ్దానాన్ని నెరవేర్చుటకు వచ్చే భగవంతుని మార్గ రక్షకునిగా కన్పిస్తున్నాడు జోజప్పగారు. వాగ్దానంగా ప్రవక్తలకు అందించబడిన దైవిక వెలుగును ఆయన తన చేతుల్లో పట్టుకొని లాలించాడు పాలక జోజప్ప గారు. అది ఎన్ని నోముల పంట!

అందుచేతనే తన భూలోక శారీరక దినములలో కుమారునిగా తనకు ఇచ్చిన సాన్నిహిత్యం, శ్రద్ధాభక్తుల వల్ల  తన సాకుడు తండ్రి యోసేపుకు ఉన్నతమైన గౌరవాన్ని బహుకరించడంలో వెనుకంజ వేయలేడు క్రీస్తు ప్రభువు. కాబట్టి నజరేతులో తనకు సమకూర్చినవన్నీటికి బదులుగా  పరలోకంలో  తన సాకుడు తండ్రికి పరిపూర్తిగా బహుకరించాడని సుస్పష్టంగా మనం నమ్మాలి. చెప్పుకోవాలి.

పునీత జోసెఫ్‌ వారితో “నీ ప్రభువు ఆనందంలోకి ప్రవేశించు” అని ప్రభువు పలికిన మాటలు సముచితమైనట్లుగా మనం ఇప్పుడు అర్ధంచేసుకోవచ్చు కదా! వాస్తవానికి, కడన ఒక భక్తుని శాశ్వత ఆనందంలోని ఆనందం తన ఆత్మలోకి ప్రవేశిస్తుంది. కానీ  ప్రత్యేకంగా ప్రభువు జోసెఫ్‌ వారితో “ఆనందంలోకి ప్రవేశించు” అని చెపుతూ ఆహ్వానం పలికి ఉండి వుండవచ్చు అని మనం నమ్ముతున్నాము. ఆ పదాలలో దాగి ఉన్న ఆధ్యాత్మిక పరమార్థాన్ని మన నుండి దాగి ఉండాలనేది ఆయన మహిమ ఉద్దేశ్యం. ఈ పవిత్ర వ్యక్తి అంతర్గత ఆనందాన్ని మాత్రమే కలిగి ఉన్నాడని కాకుండా, అది అతని చుట్టూ ఒక మహిమా కిరీటమై  సర్వలోకాల్లో  అతన్ని కొనియాడుతుందని కూడా తెలియజేస్తుంది.

పునీత జోజప్ప గారా! మమ్ములను జ్ఞాపకపరచుకొనండి. మా కోసం  మీ సాకుడు బిడ్డను వేడుకోండి. మీ అత్యంత పవిత్ర కన్య వధువు, మరియను మమ్మల్ని దయతో చూడమని అడగండి. ఎందుకంటే ఆమె – తన తండ్రి కుమార పరిశుద్ధాత్మలతో శాశ్వతంగా జీవించి పరిపాలించే మహా తల్లి. ఆమెన్.

“దేవుడు నన్ను రాజుకు తండ్రిగాను, అతని ఇంటివారందరిపై ప్రభువుగాను నియమించాడు” (Divine Office)

నీతి సూర్యుడు : ఆది 15:5-12,17-18; ఫిలి 3:17-4:1; లూకా 9:28b-36 (తపః కాలము 2 / C)

 

నీతి సూర్యుడు

ఆది 15:5-12,17-18; ఫిలి 3:17-4:1; లూకా 9:28b-36 (తపః కాలము  2 / C)

"ప్రభువు ఎడారిలో వారిని నడిపించడానికి మేఘ స్తంభంవలే వారి ముందు వెళ్ళాడు" (Divine Office)

తపస్సు కాల రెండవ ఆదివారమున మనము యేసు దివ్య రూపధారణ గురించి వింటున్నాము. యేసు రూపాంతరం అతని పాస్క రహస్యాన్ని ప్రవచిస్తుంది. సువార్తికుడు లూకా దీనిని యేసు నిర్గమంగా వర్ణించాడు. యేసు శ్రమలు, మరణం మరియు పునరుత్థానాన్ని ఈజిప్టు నుండి విడిపింపబడి ఎడారిలో ప్రయాణించిన ఇశ్రాయేలీయుల నిర్గమంతో అనుసంధానిస్తున్నాడు. అందుచేతనే  "ఆయన యెరూషలేములో సాధించబోయే నిర్గమ" (లూకా 9:31) అని లూకా వ్రాస్తున్నాడు. ఇశ్రాయేలు చరిత్ర హృదయంలో నిర్వహించబడే దేవుని ప్రణాళికను వ్యక్తపరిచే సంకేతం. యేసు రూపాంతర సంఘటనలో తన సన్నిహిత ప్రార్థన జీవితాన్ని మరియు తన మహిమను గురించి,  "యేసు (...) ప్రార్థన చేయడానికి పర్వతం పైకి వెళ్ళాడు" (లూకా 9:28) మరియు ప్రార్ధనా సమయంలో ఆయన దివ్య రూప ధారణ పొందుకున్నాడని (లూకా 9:29) వ్రాస్తూ తన ప్రార్థన జీవితాన్ని బలంగా నొక్కి చెప్పేది సువార్తికుడు లూకా మాత్రమె. దీక్షా కాలం అనేది ఆధ్యాత్మిక పంట కాలం. ప్రార్థన కోసం ఒక ప్రత్యేక సమయాన్ని సృష్టించడానికి మనకు ఒక చక్కటి అవకాశాన్ని కల్పించేది ఈ వరాల కాలమే. ప్రార్థన ద్వారా మాత్రమే మనం రూపాంతరం చెందగలము. అలాగునే లోకాన్ని కూడా మనం రూపాంతరం చెందించగలము. ప్రార్థన ద్వారా మనం  అనేక సంక్లిష్ట సంబంధాలను రూపాంతరం చెందించవచ్చు. ప్రార్థనా జీవితం వివాహాబంధాలను, కుటుంబాలను, వ్యవహారాలను, సమాజాలను, చివరకు విరక్తత్వ అంకిత జీవితాలను సహితం రూపాంతరం చెందించగలదు.

దేవుడు తన మహిమను మనతో పంచుకోవడానికి ఆసక్తిగా ఉన్నాడు! యేసు పర్వతంపై రూపాంతరం చెందినప్పుడు తన ముఖం తేజోవంతంగా మారిపోయింది మరియు ఆయన దుస్తులు తెల్లగా మారాయి (మార్కు 9:2,3). ప్రభువైన యేసు తన మహిమను మనం చూడాలని మాత్రమే కాకుండా, తన మహిమను మనతో పంచుకోవాలని కూడా కోరుకుంటున్నాడు. నన్ను అనుసరించండి. నా మాటలను పాటించండి. నేను మీ కోసం ఎంచుకున్న మార్గాన్ని తీసుకోండి.  మీరు నా తండ్రి రాజ్యపు ఆశీర్వాదాలను పొందుతారు. ఇలా పాటించినట్లయితే మీ పేరు పరలోకంలో వ్రాయబడుతుందని తండ్రి మహిమకు యేసు మనకు మార్గాన్ని చూపుతున్నాడు.

మనం ఆధ్యాత్మికంగా నిద్రపోతున్నందున దేవుని మహిమను మరియు దాని కార్యమును మనం ఎంతగా కోల్పోతున్నాము! మన మనస్సులను దేవుని విషయాల పట్ల నిద్రపోయేలా చేసే అనేక విషయాలు ఉన్నాయి:  మానసిక బద్ధకం, జారత్వం మరియు క్రమ బద్ధత లేని జీవితం. అవి మనలను దైవీక  విషయాలను ఆలోచించనివ్వకుండా, మన సందేహాలను మరియు ప్రశ్నలను ఎదుర్కోననివ్వకుండా చేస్తుంది. సుఖ జీవితం క్రీస్తు సవాలుతో కూడిన డిమాండ్లను పరిగణించకుండా మనలను అడ్డుకుంటుంది. నీ కొరకై అసూయా పరుడైన పక్షపాత  ప్రభువు నీ కోసం కలిగి ఉన్న కొత్తప్రణాళికను చూడనివ్వకుండా అంధులుగా చేస్తుంది. దేవుని మహిమ కోసం మనం దానిని పొందే౦త వరకు మన విచారం కూడా ఒక అడ్డంకిగానే మిగిలిపోతుంది.

పితృ పాదుడు మరియు పరిశుద్ధ గ్రంధ పండితుడు ఓరిజిను (క్రీ.శ. 185-254) ఇలా వ్రాశాడు, “మనం రూపాంతరం చెందినప్పుడు, మనం ఇకపై చీకటి లేదా రాత్రి బిడ్డలుగా ఉండము. పగటి కుమారులు అవుతాము మరియు యేసు నీతి సూర్యుడిగా మారినట్లే నిత్యం నిజాయితీగా నడుస్తాము. ఆజ్ఞలను పాటించడం లేదా కష్టాలను భరించడం విషయానికి వస్తే, తండ్రి పలికిన మాటలు ఎల్లప్పుడూ మన చెవుల్లో  “ఈయన నా ప్రియ కుమారుడు, ఈయనయందు నేను సంతోషిస్తున్నాను; ఈయన మాట వినండి” అని ప్రతిధ్వనించాలి.

 

“మీ హృదయాలను కఠినపరచుకోకండి” (Divine Office)

నేను నీతో ఉన్నాను కాబట్టి నువ్వు ఓడిపోకూడదు: ద్వితీ 26:4-10; రోమా 10:8-13; లూకా 4:1-13 (C లెంట్/1)

 

నేను నీతో ఉన్నాను కాబట్టి నువ్వు ఓడిపోకూడదు

ద్వితీ 26:4-10; రోమా 10:8-13; లూకా 4:1-13 (C లెంట్/1)

“ప్రభువు సిలువ మనకు జీవవృక్షమాయెను” (Divine Office)

 

లోక రక్షకునిగా తన  కోసం తండ్రి ద్వారా బాప్తిస్మం తీసుకొని ధృవీకరించబడిన వెంటనే, యేసు అపవాది చేత శోధించబడటానికి పరిశుద్ధాత్మ ద్వారా అరణ్యంలోకి నడిపించబడ్డాడని మూడు సారూప్య సువార్తలు నివేదిస్తున్నాయి. మోషే (నిర్గ 24:18) మరియు ఏలీయా (1 రాజు 19:8) కోసం దేవుడు ఏర్పాటు చేసిన నమూనా కూడా ఇదే. దేవుణ్ణి కలవడానికి ఈ ఇద్దరూ నలభై రోజుల  ఉపవాస ప్రార్థన ప్రయాణంలో నడిపించబడ్డారు. కానీ ఆతని వాక్యాన్ని ప్రకటించడానికి (నిర్గ 33:11; దితీ 18:15; 34:10), ప్రజలను పవిత్రత, నీతివంతమైన జివితంలోనికి నడిపించడానికి దేవుడు మోషే మరియు ఏలీయాను పరీక్షించాడు. వారు ఇరువురు అరణ్యంలో ఉపవాస ప్రార్థనలు చేశారు. దేవుడు వారిని తన జీవమిచ్చే వాక్కుతో భోజనం పెట్టాడు. వారు విశ్వాసం, ఆశ మరియు ప్రేమలో పునరుద్ధరించబడ్డారు.

 

యేసు అరణ్యంలో నలభై రోజులు గడిపిన తర్వాత, సాతాను అతనిని శోధించాడని లూకా వ్రాస్తున్నాడు. ఈ మోసగాడు అపవాది (లూకా 4:1), అబద్ధాలకు తండ్రి (యోహా 8:44) మరియు ఈ లోక పాలకుడు (యోహా 12:31; 2 కొరింథీ 4:4). పరదైసు తోటలో ఆదాము హవ్వలను శోధించిన మోసగాడే అతడే (ఆది 3). సాతాను యేసును ఎందుకు శోధించాడు? దేవుని రాజ్యం కోసం యేసు ఒక ప్రాముఖ్యమైన ఆధ్యాత్మిక లక్ష్యాన్ని చేపడుతున్నాడని సాతానుకు తెలుసు. యేసు శారీరకంగా మరియు మానసికంగా బలహీనంగా ఉన్నట్లు కనిపించినప్పుడు సాతానుకు దాడి చేసే అవకాశం లభించింది. అతను సుదీర్ఘ ఉపవాస ప్రార్ధనలో ఉండటం వల్ల శారీరకంగా బలహీనంగా ఉన్నట్లు కనిపించాడే కానీ దైవత్వమున ధీరుడే. తండ్రి దేవుని మార్గాన్ని కాకుండా తన మార్గాన్ని ఎంచుకునేలా యేసును ఒప్పించగలనని సాతాను నిస్సందేహంగా భావించుకున్నాడు.

 

సాతాను మొదటి శోధన యేసు శారీరక ఆకలిని ఆకర్షించింది. ఆ ఆకలి బాధ మరణ త్యాగం చేయవలసి వచ్చినప్పటికీ తన తండ్రి వాక్కు కోసమే యేసు ఆ ఆకలిని భరించాడు. యేసు ఉల్లేలేఖన పదాలతో సాతాను ఉచ్చును ఇలా ఓడించాడు, "మనుష్యుడు రొట్టెవలన మాత్రము కాదు, దేవుని నోటి నుండి వచ్చు ప్రతీ వాక్కువలనను జీవించును" (ద్వితీ 8:3; మత్త 4:4). లోకం అందించగల అతి ఉత్తమమైన సుందరమైన వాటిని అతనికి అందించే ప్రయత్నంలో సాతాను రెండవసారి యేసును శోధించాడు. కానీ “నీ దేవుడైన ప్రభువును ఆరాధించి ఆయనను మాత్రమే సేవించాలి” (ద్వితీ 6:13) అన్న జీవ వాక్కుతో ఉటంకించడం ద్వారా తన తండ్రి చిత్తాన్ని మాత్రమే తన సంపదగా మరియు ఆనందంగా చేసుకోవాలని యేసు ఎంచుకున్నాడు. సాతాను చివరి శోధన విచిత్రమైనది. సృష్టికర్తకే సృష్టి అందాన్ని చూపించడం! యెరూషలేములోని ఆలయ శిఖరాన తనను తాను నిలబెట్టుకోవాలనీ, తాను మెస్సీయ అని నిరూపించే ఒక సూచనను చేయాలనీ చెపుతూ జీవ వాక్యాన్ని ప్రభువుకు ఎత్తి చూపడం! సైతాను కూడా పరిశుద్ధ గ్రంధాన్ని బాగా చదివాడన్న  మాట. చూడండి ఎలా కీర్తన వాక్యాన్ని చెపుతున్నాడో! "ఆయన నిన్ను కాపాడటానికి తన దూతలను ఆజ్ఞాపిస్తాడు. వారు తమ చేతులపై నిన్ను మోస్తారు. నీ పాదములకు రాయి తగులకుండ వారు నిన్ను తమ చేతులమీద ఎత్తి పట్టుకొందురు” (కీర్త 91:11-12). తాను మెస్సీయ అని తన దైవిక వాదనను నిరూపించుకోవడానికి సాతాను చేసిన పరీక్షను యేసు ఇలా తిరస్కరించాడు. “‘నీ దేవుడైన ప్రభువును పరీక్షించకూడదు’ అన్న వాక్యంతో (ద్వితీ 6:16) ఉటంకించాడు.

 

మన స్వంత జీవితాల్లో శోధనలతో పోరాడి పాపాన్ని అధిగమించడానికి మనం ఎలా ఆశించవచ్చు? యేసు పరిశుద్ధాత్మచే నడిపించబడ్డాడు. దేవుడు మన నిజ విశ్వాసాన్ని ఒక ఉదాహరణగా చూపడానికి దానిని పరీక్షకు గురుచేస్తాడు. ఆయన మనల్ని ఒంటరిగా విడిచిపెట్టడు. మనం భరించగలిగినంత కంటే ఎక్కువగా మనల్ని శోధించనివ్వడు” (1 కొరింథీ 10:13). “మీరు కుడివైపుకు తిరిగినప్పుడల్లా, ఎడమవైపుకు తిరిగినప్పుడల్లా, ‘ఇదే మార్గం, దీనిలో నడువు’ అని మీ వెనుక నుండి ఒక శబ్దం మీ చెవులకు  వినబడుతుంది” (యెష 30:21). యేసు తన మానవ బలంపై ఆధారపడలేదు. మన బలహీనతలో మనకు సహాయం చేయడానికి పరిశుద్ధాత్మ బలం మార్గదర్శకత్వం అవసరమని ఆయన నేర్పిస్తున్నాడు (రోమా 8:26). మనం ఆయనపై ఆధారపడటాన్ని అంగీకరించినప్పుడు ఆయన మనతో ఉంటాడు (యోహా 4:6). సాతాను దాడులకు వ్యతిరేకంగా స్థిరంగా నిలబడటానికి ఆయన మనకు సహాయం చేస్తాడు (1 పేతు 5:8-10; ఎఫె 6:10-18). పాపాన్ని అధిగమించడానికి, పాపపు సమీప సందర్భాలను నివారించడానికి మనం దేవుని జ్ఞాన మార్గదర్శకత్వాన్ని వెతుకుతున్నామా? నలభై రోజుల లెంట్‌లో, ఈస్టర్ పండుగ వైపు మన ఆధ్యాత్మిక పునరుద్ధరణ యొక్క అరణ్యంలో ప్రభువుతో ప్రయాణించడానికి మనం పిలువబడ్డాము. క్రీస్తు మరణం మరియు పునరుత్థానం విజయంలో పాలుపంచుకోవడానికి మనం కూడా సిలువ మార్గాన్ని అనుసరించాలి. ఈ పవిత్ర వడకం మరియు పునరుద్ధరణ సంయంయంలో  - విశ్వాసం, ఆశ మరియు ప్రేమలో మనం ఎదగడానికి ఆయన పరిశుద్ధాత్మ నూతన ప్రవాహం కొరకు ప్రార్థిద్దాం.

 

“మీరు కత్తికి బలైపోరు. మీ జీవితం సురక్షితంగా ఉంటుంది. ఎందుకంటే నేను మీతో ఉన్నాను” (Divine Office)

పశ్చాత్తాపపడండి. విశ్వసించండి యావేలు 2:12-18; 2 కొరింథీ 5:20-6:2; మత్తయి 6:1-6,16-18

పశ్చాత్తాపపడండి. విశ్వసించండి.

యావేలు 2:12-18; 2 కొరింథీ 5:20-6:2; మత్తయి 6:1-6,16-18

"ప్రభువు పాపాత్ముని మరణములో సంతోషించడు, కానీ అతడు తన మార్గమును విడిచి జీవించాలని కోరుచున్నాడు" (Divine Office)

క్రీస్తు రక్తంపై మన దృష్టిని కేంద్రీకరిద్దాం. అది తన తండ్రి దేవునికి ఎంత విలువైనదో గుర్తిద్దాము. ఎందుకంటే అది మన రక్షణ కోసం చిందింపబడింది. ప్రపంచమంతటికీ పశ్చాత్తాప దయను అందించింది. చరిత్రలోని వివిధ యుగాలను మనం సమీక్షించినట్లయితే, ప్రతి తరంలో ప్రభువు తన వైపుకు మళ్ళడానికి ఇష్టపడే వారికి పశ్చాత్తాపపడే అవకాశాన్ని అందించాడని మనం చూస్తున్నాము. నోవహు పశ్చాత్తాపానికి సంబంధించిన దేవుని సందేశాన్ని బోధించినప్పుడు, అతని మాట విన్నవారందరూ రక్షించబడ్డారు. వారు నాశనం చేయబడతారని యోనా నీనెవె వాసులకు చెప్పాడు. వారు పశ్చాత్తాపపడినప్పుడు దేవుని క్షమాపణను పొందుకున్నారు. వారు దేవుని ప్రజలకు చెందినవారు కానప్పటికీ వారు రక్షించబడ్డారు.

 

పరిశుద్ధాత్మ ప్రేరణతో, దేవుని దయను అందించే పరిచారకులు పశ్చాత్తాపం గురించి బోదించారు. నిజమే, విశ్వాధిపతి  స్వయంగా పశ్చాత్తాపం గురించి, "నేను జీవించివున్నప్పుడు, నేను పాపి మరణాన్ని కోరుకోను, అతని పశ్చాత్తాపాన్ని కోరుకుంటున్నాను” అని బలీయంగా చెప్పాడు. తన మంచితనానికి రుజువును చూడండి, “ఇశ్రాయేలు గృహమా! మీ దుష్టత్వం గురించి పశ్చాత్తాపపడండి. నా ప్రజల కుమారులతో చెప్పు: వారి పాపాలు భూమి నుండి స్వర్గానికి చేరుకుంటే, అవి ఎర్రటి రంగు కంటే ప్రకాశవంతంగా మరియు గోనెపట్ట కంటే నల్లగా ఉంటే, మీరు మీ పూర్ణ హృదయంతో నా వైపు తిరిగి, “తండ్రీ" అని పిలువండి. నేను పవిత్ర ప్రజలుగా మీ మాట వింటాను”.

 

మరో మాటలో చెప్పాలంటే, దేవుడు తన ప్రియమైన వారందరికీ పశ్చాత్తాపపడే అవకాశం కలిగి ఉండాలని కోరుకున్నాడు. అతను తన సర్వశక్తిమంతుడైన సంకల్పంతో ఈ కోరికను ధృవీకరించాడు. అందుకే మనం ఆయన సార్వభౌమ మహిమాన్వితమైన సంకల్పానికి లోబడాలి. ప్రార్థనాపూర్వకంగా ఆయన దయను కోరుకోవాలి. మనం అతని ముందు మర్యాదగా ఉండాలి. అతని కరుణ వైపు మళ్లాలి. శూన్యమైన పనులను తిరస్కరించి మరణానికి దారితీసే కలహాలు మరియు అసూయను విడిచిపెట్టాలి.

 

సోదరులారా! అహంకారం మరియు మూర్ఖమైన కోపాన్ని పక్కనపెట్టి మనం వినయంగా ఉండాలి. బదులుగా, పరిశుద్ధాత్మ చెప్పినట్లుగా మనం లేఖనాల ప్రకారం ప్రవర్తించాలి, “జ్ఞాని తన జ్ఞానంలోనూ, బలవంతుడు తన బలంలోనూ, ధనవంతుడు తన సంపదలోనూ  కీర్తినొందకూడదు. బదులుగా, ప్రభువును వెదకడం ద్వారానూ  సరైనది మరియు న్యాయమైన పనులను చేయడం ద్వారా ఆయనలో మహిమపరచబడాలి. యేసు ప్రభువు సౌమ్యత మరియు సహనాన్ని బోధించినప్పుడు ప్రత్యేకంగా ఏమి చెప్పాడో గుర్తు చేసుకోండి! కనికరం చూపండి. తద్వారా మీరు మీపై దయ చూపుతారు. క్షమించు. తద్వారా మీరు క్షమించబడతారు. మీరు ఇతరులతో ఎలా ప్రవర్తిస్తారో, అలాగే మీరు కూడా  అదే కొలతను పొందుతారు. మీరు ఇచ్చినంతగా, మీరు అందుకుంటారు. మీరు తీర్పు తీర్చినట్లే, మీరునూ తీర్పు తీర్చబడతారు. మీరు ఇతరుల పట్ల దయతో ఉన్నట్లే, మీరు కూడా దయతో వ్యవహరిస్తారు. మీరు ఇచ్చే కొలమానం మీరు స్వీకరించే కొలమానం అవుతుంది.

 

ఆయన పవిత్రమైన మాటలకు వినయపూర్వకంగా విధేయతతో జీవించడానికి ఈ ఆజ్ఞలు మనలను బలపరుస్తాయి. అదేవిధంగా పవిత్ర గ్రంథం చెపుతున్న్నట్లు, నా మాటలకు వణుకుతున్న, వినయపూర్వకమైన, శాంతియుత వ్యక్తిని తప్ప నేను ఎవరిని దయతో చూస్తాను?  అనేక విస్తారమైన అద్భుతమైన విజయాల వారసత్వాన్ని పంచుకుంటూ, ప్రారంభం  నుండి మన ముందు ఉంచిన శాంతి లక్ష్యం వైపు త్వరపడదాము. విశ్వాధిపతి తండ్రి మరియు సృష్టికర్తపై మన దృష్టిని దృఢంగా నిలుపుదాం మరియు అతని అద్భుతమైన అత్యున్నతమైన శాంతి బహుమతులను, అతని అన్ని ఆశీర్వాదాలను దృడంగా పొందు కుందాము.

                                    పోపు పునీత  క్లమెంటు I,  కొరింథియులకు వ్రాసిన లేఖ నుండి (Divine Office)

 

“పశ్చాత్తాపపడి తపస్సు చేయండి. మిమ్మల్ని మీరు కొత్త హృదయంగా మరియు కొత్త ఆత్మగా చేసుకోండి"