కానా వివాహము – లోక కళ్యాణ దివ్య సంస్కారం: యెషయ 62:1-5; 1 కొరింథి 12:4-11; యోహాను 2:1-11 (C 2)

 

కానా వివాహము – లోక కళ్యాణ దివ్య సంస్కారం

యెషయ 62:1-5; 1 కొరింథి 12:4-11; యోహాను  2:1-11 (C 2)

మీ కళ్ళు ధన్యమైనవి, ఎందుకంటే అవి చూస్తున్నాయి (Divine Office)

 

దేవుని రక్షణను వివరించడానికి అద్భుతాలు, వివాహా విందులు, ‘ద్రాక్షా వల్లి రెమ్మలు’ వంటి సంకేతాలు మరియు చిహ్నాలు పరిశుద్ధ గ్రంథంలో చాలానే ఉన్నాయి. యోహాను సువార్తికుడు క్రీస్తు చూపించిన ‘సంకేతాల’ను మన కళ్ళు చూడ మించిన వాటి పరమార్ధాన్ని చూపే సంజ్ఞలుగా అర్థం చేసుకున్నాడు. ఇశ్రాయేలుకు యెహోవా ఇచ్చిన వాగ్దానాన్ని తిరిగి అర్థం చేసుకోవడానికి మరియు నెరవేర్చడానికి అతను యేసును మనకు సమర్పించుకున్నాడు. కానా పల్లె వద్ద ‘నీటిని ద్రాక్షారసంగా మార్చడం’ అనే సంకేతం, యేసు మనకు అందించే “పరిపూర్ణ పరివర్తనాత్మక రక్షణను” మనకు తెస్తుంది. ప్రేమకు చిహ్నంగా ఓ పెళ్లి వేడుకలో ఈ సంకేతం జరిగింది. ఇది మానవులతో దేవుని నిశ్చయాత్మకమైన సహవాసాన్ని వ్యక్తీకరించడానికి పరిశుద్ధగ్రంథ సంప్రదాయంలో మనకు కనిపించే అత్యత్తమ ప్రతిమ. జీవితమంతా విచిత్రంగానూ దిక్కుతోచలేనంత అయోమయ స్థితిలో దిగాలుగా ఖాళీ అయిపోయింది   అనిపించినప్పుడు యేసు అనుచరులు తన మోక్షాన్ని  తప్పనిసరిగా వెతకి జీవించాలి మరియు దానిని ఇతరులకు అందించాలి. పాత నిబంధనలో 'ద్రాక్షా రసం' అనేది దేవుని బహుమతిగానూ  ఆశీర్వాదంగా పరిగణించబడింది (ద్వితీ 7:13; సామే 3:10, కీర్తన 105). యేసు మనకు తెచ్చే రక్షణ  మన జీవితంలో విశ్వాసాన్ని పునరుద్ధరిస్తుంది.

నేడు చాలా మంది క్రైస్తవ, అందునా కథోలిక విశ్వాసులు దేవాలయంలో జరిగే సాంఘిక దైవీక సంస్కారముల పరిచర్య అనేది జీవాన్ని ఇచ్చే సజీవ సంజ్ఞలుగా భావించడం లేదు. పరిగణించడంలేదు.  ప్రార్ధనా వేడుక వారికి ‘బోరింగ్‌’ అనిపిస్తుంది. అందుచేతనే మాతృ శ్రీసభ - జీవితంలోని బాధలు, క్రూరత్వాలను తగ్గించడానికి యేసు సామర్థ్యాన్ని కనుగొనాలని, అందునా ఆధ్యాత్మిక జీవితాన్ని ధృవీకరించే అర్చన సంస్కార సంకేతాలను మరియు చిహ్నాలను చూచి గ్రహించమని మనలను ఆహ్వానిస్తుంది. సంతోషకరమైన వార్తగా అనిపించని విషయాన్ని మరి ముఖ్యంగా రెండంచులు కలిగిన ఖడ్గంలాంటి వాక్యాన్ని నిష్పక్షపాతంగా బోధిస్తే ఈ రోజున ఎవరు వినాలనుకుంటున్నారు? యేసుక్రీస్తు మన ఉనికికి కారణాన్ని, ప్రేమించే శక్తిని, సున్నితంగా ఆనందంగా, ఋజువర్తనంగా జీవించడానికి ఒక జీవనశైలిని మనకు అందించడానికి వచ్చాడు. నేడు విశ్వాసులు కేవలం సైద్ధాంతిక మతాన్ని మాత్రమే తెలుసుకోవడానికి ఇష్ట పడుతున్నారే కాని, దేవుని ప్రేమకు వున్న నిజ అందాన్ని ఆరాధించలేకపోతు న్నారు. అందుచేతనే సత్య సభకు చాలా మంది దూరంగా ఉంటున్నారు.

వివాహ విందులో, యూదులు తమ శుద్ధీకరణకు ఉపయోగించే నీటిని కూజాలనుండి 'బయటకు తీసిన'ప్పుడు మాత్రమె ఆ నీటిని ద్రాక్షారసంగా రుచి చూడగలిగారు. నీటిలో నిగూఢమైయున్న జీవాత్మక రుచిని చూరగొనలేక పోయారు. మానవ శరీరధారి యేసులో నిక్షిప్తమైయున్న త్రిత్వ దైవత్వాన్ని మరి ఇంకేమి గ్రహించగలరు? శిలాఫలకాలపై రాసుకున్న ధర్మశాస్త్రం కొందరికి అరిగి కరిగి పోయినట్లుంది! మానవ అవసరాలను శుద్ధి చేసి సంతృప్తి పరచగల జీవజలమేదీ ఇక లేదని వారు భావిస్తున్నారు. “అక్షరము చంపునుగాని ఆత్మ జీవింపచేయును”(2 కొరి 3:6). అందుచేతనే అక్షర రూపంలో ఉన్నధర్మ శాస్త్రం ఆత్మతో భర్తీ చేయబడింది. యేసు వ్యక్త పరచే ప్రేమ జీవితం ద్వారా “మతం” విముక్తి పొందాలి. మనలోనూ మరియు మన సోదరుల్లో పరివర్తన చెందుతున్న యేసు ప్రేమను తెలుసుకోవడానికి, కేవలం బోధనాత్మక మాటలు సరిపోవు. సంజ్ఞనాత్మక సేవలు మరియు చెడును ఖండించగలిగే ధార్మికత కూడా అవసరం.

యేసు సుందర ఆనందకరమైన శైలిని మన స్వంతం చేసుకోవాలి. కానా వివాహం అనే  పరలోక విందు వేడుకలో సమస్త జనావళిని స్వాగతించే ఆనందం మాదిరిగానే మన తిరుసభ కలిగియున్న వైఖరి ఎడల నేను చాలా సంతోషంగా ఉన్నాను. మనం కూడా యేసు మానవత్వానికి దగ్గరవుతూ, ఆయనలోని మానవ స్వభావాన్ని మరింత లోతుగా తెలుసుకొని పొరుగు వారిని ప్రేమించేందుకు ప్రయత్నిస్తూ, ఆయన మాట వింటూ, విశ్వాసంలో వృద్ధి చెందుతూ, తండ్రి ముఖాన్నికుమార యేసులో చూసే వరకు పరిశుద్దాత్మన మనం ప్రయాసపడదాం. లోక కళ్యాణ విందులోని త్రిత్వై౦లో ప్రమోదం చెందుదాం.   

 

“మీ చెవులు ధన్యమైనవి, ఎందుకంటే అవి వింటున్నాయి” (Divine Office)

మన శుద్ధి కోసం ఆయన జలాలను పవిత్రం చేశాడు (యేష 40:1-5,9-11; తీతు 2:11-14; 3:4-7; లూకా 3:15-16,21-22 (యేసు బాప్తిస్మము – C)

 

మన శుద్ధి కోసం ఆయన జలాలను పవిత్రం చేశాడు

 

(యేష 40:1-5,9-11; తీతు 2:11-14; 3:4-7; లూకా 3:15-16,21-22 (యేసు బాప్తిస్మము – C)

“ఇదిగో దేవుని గొర్రెపిల్ల. లోక పాపాలను మోసుకొనుపోవు వ్యక్తిని చూడు" (Divine Office)

 

ఈ రోజు మనం ప్రభువు బాప్తిస్మపు పండుగను జరుపుకుంటున్నాము. యేసు బాప్తిస్మము మూడు సారూప్య సువార్తలయిన మత్తయి, మార్కు, లూకా లో నివేదించబడింది. యేసు స్వీకరించిన బాప్తిస్మ సంస్కారము యేసులో నిక్షిప్తమైయున్న దేవుణ్ణి అభివ్యక్తిగా చూపెడుతుంది. ఇది మరొక ఎపిఫనీ లేదా దేవుని సాక్షాత్కారం. లూకా సువార్తలో ప్రసాదించబడిన ఈ బాప్తిస్మ సన్నివేశంలో త్రిత్వైక సర్వేశ్వరుణ్ణి మనము చూస్తున్నాము. వినిపించబడిన స్వరంలో తండ్రిదేవుడు,  పావుర రూపమున ఆకాశ మండలాల నుండి దిగివచ్చిన పవిత్రాత్మ దేవుడు, యోర్దాను నది జలంలో శరీరధారి వాక్కైన దేవుని ఏకైక కుమార దేవుడు – త్రిత్వైక దేవుడుగా మనకు సాక్షాత్కరించడం గొప్ప వరం.

 

దేవుని కుమారుడు యేసు యోర్దాను నదీ జలాలో బాప్తిస్మం తీసుకోవాలని ఎందుకు కోరుకున్నాడు? ఈ సంస్కారం దేవునకు అవసరమా? సృష్టి కర్త సృష్టి చేత సంస్కరింపబడతాడా? పవిత్ర ప్రజలను నీరు శుద్ధి చేస్తుందా లేక మానవులను శుద్ధి చేయడానికి అతిపవిత్ర జనుల ప్రవేశంతో నదీ జలాలు శుద్ధి చేయబడతాయా? తనచే యేసు బాప్తిస్మం తీసుకోకుండా బాప్తిస్మ యోహాను ఆపడానికి ప్రయత్నించాడు. “నేను మీ ద్వారా బాప్తిస్మం తీసుకోవాలి. మీరు నా దగ్గరకు రావడం ఏమిటి? అని వారించ బోయాడు యోహాను. అపుడు యేసు అతనితో, “ఇప్పుడు ఇలా జరగనివ్వండి” (మత్త 3:14-15) అని నచ్చ జెప్పాడు. ఇటలీ దేశంలోని ట్యూరిను అను ప్రాంత పీఠాధిపతి అయిన పునీత మాక్సిమసు ఈ సంభాషణను బాగా అర్థం చేసుకొని ఇలా వ్రాస్తున్నాడు: “యేసు క్రీస్తు బాప్తిస్మం తీసుకోవడానికి గల కారణం యోర్దాను జలాల ద్వారా తాను పవిత్ర పరపబడడానికికాదు. కానీ అతను తాకిన నీరు అంతా మరియు భూమి మీద నెలకొని యున్న నీటి నంతటిని శుద్ధి చేయడానికి యేసు యోర్దాను నదిలో దిగాడు. రక్షకుడు నది నీటిని ఆ సమయాన తాకినపుడు సర్వ మానవాళి బాప్తిస్మం కోసం సర్వ జలాలు శుభ్రంగా తయారు చేయబడినాయి. భావి యుగాల ప్రజలకు బాప్తిస్మ కృపను అందించడం కోసం యేసు తన బాప్తిస్మ సంస్కారం ద్వారా సర్వ జలాలను శుద్ధి చేసాడు.

 

ఎర్ర సముద్రం గుండా ఇజ్రాయేలు బిడ్డలు వెడలినపుడు వారికి ముందు అగ్ని స్తంభం వెళ్ళింది. తద్వారా వారు వారి నిశి రాత్రి ప్రయాణంలో ధైర్యం పొందుకున్నారు. అదే విధంగా, బాప్తిస్మపు నీటి ద్వారా యేసును అనుసరించే వారికి మార్గాన్ని సిద్ధం చేయు నిమిత్తం యేసు సత్య వెలుగు స్తంభమై మొదట యోర్దాను నదీ జలాల గుండా వెళ్ళాడు. ఇశ్రాయేలీయుల నిర్గమ సమయంలో అగ్ని స్తంభము వారికి కాంతిని అందించింది. ఇప్పుడు అది బాప్తిస్మపు స్నానంలో మన విశ్వాసుల హృదయాలకు వెలుగునిస్తుంది. పాపమున మనము ఆదాము ఏవ పిల్లలము. కానీ ఇప్పుడు బాప్తిస్మము ద్వారా మరోసారి దేవుని బిడ్డలముగా రూపుదిద్దబడినాము. బాపిస్మము అనేది జీవితకాల పిలుపుకు నాంది”(Divine Office) అని నమ్మాడు.

 

బాప్తిస్మము పొందిన యేసు మనలను తన పోలికలో పునరుద్ధరించడానికి తన చైతనాత్మక క్రియ అయిన  పరిశుద్ధాత్మ బహుమానం ద్వారా ఎల్లప్పుడూ సిద్ధంగానే ఉన్నాడు. అతను నీతి, శాంతి మరియు సంతోషాలను నెలకొల్పి అందించే తన రాజ్యానికి మిషనరీలుగా మనలను అభిషేకించాడు (రోమా 14:17). మన చుట్టూ ఉన్నవారికి ఆయన దయ మరియు మంచితనపు  అందచందాలతో నిండిన సువాసనలను ప్రసరింపజేసే ఆతని రాజ్యానికి మనము "వెలుగు మరియు ఉప్పు" అని మనలను పిలిచాడు (Mt 5:13,15-16). ఇతరులు పరిశుద్ధాత్మలో నూతన జీవితాన్ని, స్వేచ్ఛను ఆనందాన్ని పొందేలా తన ప్రేమ మరియు సత్యం మన ద్వారా ప్రకాశించాలని ప్రభువైన యేసు కోరుకుంటున్నాడు. తిరుసభ పితృపాదులు గ్రెగొరీ ఆఫ్ నజియాంజసు ఇలా చెబుతున్నాడు: “క్రీస్తుతో పాటు ఉత్థాన మవ్వడానికి బాప్తిస్మము ద్వారా మనం క్రీస్తుతో సమాధి చేయబడినాము. అతనితో లేపబడుటకు మనము అతనితో కలిసి మరణిద్దాము. అతనితో పాటు మహిమపరచబడుటకు మనము కూడా ఆయనతోపాటు  ఉత్థానమవుదాము".

 

నిబద్ధత కలిగిన క్రైస్తవుడు క్రీస్తు జీవితంలోని మన భాగస్వామ్య క్రియాత్మక ప్రభావాలను నిర్ధారించగలడు. మనం ఆధ్యాత్మిక సజీవులం. మనము దేవుని కుమార కుమార్తెలం. యేసు బాప్తిస్మ సమయంలో స్వర్గం నుండి వచ్చిన స్వరం, “ఈయన నా ప్రియమైన కుమారుడు,  ఇతనియందు నేను సంతోషించుచున్నాను” అని యేసును గూర్చి చెప్పిన ఘనత యేసు ఆత్మలో జీవించే మనకు కూడా దక్కుతుంది. ఇది నిజం. తధ్యం.

 

“ఇతను మనుషుల మధ్య దేవుని నివాస స్థలం. ఇతను మన మధ్య నివసిస్తున్నాడు" (Divine Office)

 

మనం దేవుడిని చూశాం: యెషయ 60:1-6; ఎఫేసి 3:2-3a,5-6; మత్త 2:1-12 (క్రీస్తు సాక్షాత్కారం C)

 

మనం దేవుడిని చూశాం

యెషయ 60:1-6; ఎఫేసి 3:2-3a,5-6; మత్త 2:1-12 (క్రీస్తు సాక్షాత్కారం  C)

“మనము వెళ్లి ఆయనను వెదకుదాము. మనం అతనికి బంగారము,  బోళము మరియు సుగంధ పరిమళాల బహుమతులను అందజేద్దాం” (Divine Office)

 

ఆంగ్ల పదం “ఎపిఫనీ” గ్రీకు పదం “ఎపిఫనీయ” అనే పదం నుండి వెలువడింది. తెలుగు భాష నందు "వ్యక్తీకరణ" లేదా “ సాక్షాత్కారము" అని అర్ధం. యేసును ఇజ్రాయేలు మెస్సీయగా, దేవుని కుమారుడుగా మరియు ప్రపంచ రక్షకునిగా చూపడం" అని ఈ మాటకు అర్థం. చారిత్రాత్మకంగా క్రీస్తు ప్రారంభ జీవితంలో మరియు తన పరిచర్య జీవిత క్షణాల్లో అనేక "ఎపిఫనీ"లను జరుపుకుంటాము. వీటిలో ప్రాముఖ్యంగా బెత్లెహేములో అతని జననం, జ్ఞానుల సందర్శన, బాప్తిస్మ యోహాను చేత ఆతని బాప్తిస్మము మరియు గలలీయలోని కానా పల్లెలో అతని మొదటి అద్భుతం (CCC 528).

 

తిరుసభ పితృ పాదులు జాను క్రిసోస్టముడు  బెత్లెహేము నక్షత్రపు ప్రాముఖ్యతను చాలా చక్కగా వివరిస్తాడు. జ్ఞానులు బెత్లెహేము గమ్యాన్ని చేరుకునే వరకు ఆ నక్షత్రం పవిత్ర స్థలాన్ని ప్రకాశింపజేసింది అని వ్రాశాడు. తూర్పు నుండి దేవుని జ్ఞానం కోసం దాహంతోవచ్చిన జ్ఞానుల  నిజమైన జ్ఞాన మూలం యేసు క్రీస్తు!! దేవుని కాంతి జ్ఞానాన్ని వెతకడానికి ఇష్టపూర్వకంగా సమస్తమును విడిచిపెట్టారు. వారు నవజాత రాజును కనుగొన్నప్పుడు  వినయంగా అతనిని వారు ఆరాధించారు. ఆ రాజు  శాంతి యువరాజు (యేష 9:6), రాజులకు రారాజు (ప్రకటన 19:16). అందుచేతనే ఆతనికి తగినటువంటి బహుమతులు ఇచ్చారు.

యేసు ఈ లోకానికి వచ్చినప్పుడు లోకం ఆయనను తెలుసుకోలేదని మరియు ఆయన స్వంత ప్రజలే  ఆయనను స్వీకరించలేదని భక్త యోహాను సువార్తికుడు పేర్కొన్నాడు (యోహా 1:10-11). ఆ నిశి రాత్రిన జ్ఞానులు, మరి కొంతమంది గొర్రెల కాపరులు తప్ప ప్రపంచంలోని మిగిలిన వారందరూ అంధకారంలోనే వుండిపోయారు. యూదుల పెద్దలకు ఏమైంది? వాగ్ధాన ప్రవచనాలు కప్పివేయ బడ్డాయా? కానీ మనం మాత్దేరం వుడిని చూశాం (న్యాయాధి. 13:22; యోహా 14:9; యోహా 1:14). విశ్వాసం అనేది భగవంతుడు మనకు ఇచ్చే పూర్తి బహుమతి. పరిశుద్ధాత్మ సహాయం ద్వారా, దేవుడు తన కుమారుడైన యేసుక్రీస్తు ద్వారా వెల్లడించిన సత్యాన్ని అర్థం చేసుకోవడానికి, అంగీకరించడానికి మరియు విశ్వసించడానికి హృదయం అనేది మనస్సు కళ్ళను తెరుస్తుంది. విశ్వాస జీవితంలో, మానవ సంకల్పం మరియు బుద్ధి అనేవి దేవుని దయతో సహకరించాలి కదా! అందుచేతనే పునీత థామస్ అక్వినాసు “మానవ బుద్ధిన విశ్వాస క్రియ అనేది దేవుని కృప చేత ప్రేరేపించబడిన సంకల్పంవల్ల దైవీక సత్యం వైపు చైతన్యం చేయబడే ఒక చర్య” అని అంటాడు.

 

జ్ఞానులు బహుకరించిన బహుమతుల అర్థం క్రీస్తు శాస్త్రము (క్రిస్టోలాజి)నకు అనుబంధముగా వుందని  అని మనము నమ్ముతున్నాము. యేసు, రాజు కాబట్టి దానికి ప్రతినిధిగా బంగారం సమర్పించబడింది. యాజకులు ఆలయంలో దేవునకు సాంబ్రాణి పదార్థాన్నిఅర్పిస్తారు. యేసు నిత్య శాశ్విత యాజకుడు కాబట్టి దానికి అణుగుణంగా సాంబ్రాణిని  సమర్పించారు. మరణించిన వారి దేహములకు సుగంధ పరిమళాలను పూస్తారు. యేసు క్రీస్తు సంపూర్ణ దేవుడు సంపూర్ణ మానవుడు. మానవ కళ్యాణార్ధం మరణించ బోతున్నాడని వేద జ్ఞానాన్ని గ్రహించిన తూర్పు జ్ఞానులు ముందుగానే ఆతని సమాధి సంసిద్ధత కొరకు ఉపయోగించే ఆ సుగంధ ద్రవ్యములను బహుకరించారు.

 

మరి మనము ఆతనికి ఏమి బహుహరించాలనుకుంటున్నాము? యేసుక్రీస్తును కలుసుకోవడమంటే దేవుణ్ణి వ్యక్తిగతంగా తెలుసుకోవడం. యేసుతో జ్ఞానుల ముఖాముఖి సాక్షత్కారమున, యూదు ప్రజలకు మాత్రమె కాకుండా సర్వ ప్రజలకు తన ఏకైక కుమారుడిని రాజుగా రక్షకునిగా ఇవ్వాలనే దేవాధి దేవుని ప్రణాళికను చూస్తున్నాము. యూదులు మరియు అన్యజనులు ఇద్దరూ దేవునితో నిజమైన శాశ్వతమైన శాంతిని కనుగొనడానికి యేసు ప్రభువు వచ్చాడు. చివరిగా, బెత్లెహేము అను పదం రెండు హేబ్రియ పదాల కలియిక. బెత్ అంటే ఇల్లు అనీ, లేహెం అంటే రొట్టె అని అర్ధం. మొత్తంగా బెత్లెహేము అంటే “గృహ రొట్టె” అని అర్ధం. బెత్లెహేములో సాక్షాత్కారించిన యేసు సజీవ రొట్టె. నిత్య జీవమునకు ఆకలిని తీర్చే నిత్య జీవాహారం. యేసును విశ్వసించే మనము, విశ్వసించని వారందరూ ఆ “బెత్లెహేము”లోనే మన ఆధ్యాత్మిక జీవిత ప్రయాణం కొనసాగాలని ప్రార్థిద్దాం.

 

“మనం ఆయన కుమారుడైన యేసుక్రీస్తులో ఉన్నట్లే మనం నిజమైన దేవునిలో ఉన్నాము” (Divine Office)

దేవుని తల్లి : సంఖ్యా 6:22-27; గలతీ 4:4-7; లూకా 2:16-21

 

దేవుని తల్లి

సంఖ్యా 6:22-27; గలతీ 4:4-7; లూకా 2:16-21

"నిన్ను సృష్టించిన దేవునకు నువ్వు జన్మనిచ్చావు. నువ్వు ఎప్పటికీ కన్యగానే  ఉన్నవు" (Divine Office)

 

పవిత్ర కన్య మరియ దేవుని తల్లి కాదు అని ప్రతి పాదించి బోధించిన నేస్తోరియను అను వేదాందితికి సరైన జవాబు ఇచ్చినదే ఎఫేసుసు మహాసభ. ఎఫేసుసు అను ప్రాంతం పూర్వ గ్రీసు ఆసియా మైనరు మరియు రోము సామ్రాజ్యపు భాగంగా వుండేది. ప్రస్తుతం టర్కీ దేశ భాగం. నేస్తోరియను సిద్దాంతమును తర్కించడానికి నాటి రోము చక్రవర్తి  రెండవ తెయోదోశియుసు ఆనాటి పోపు సేలేస్తియను (1) అనుమతితో  క్రీస్తు శకం 451 వ సంవత్సరం, జూను నేలలో ఈ ఎఫెసుసు నందు ఒక మహా సభను 197 పీఠాధి పతులతో ఏర్పాటు చేశాడు. అసమ్మతి సిద్ధాంతమును బోధించిన నేస్తోరియను మాత్రం హాజరు కాలేదని చరిత్ర చెపుతుంది. హాజరయిన పీఠాధిపతులందరు ఏకగ్రీవమున ఈ మహాసభనందు యేసుక్రీస్తుకు జన్మనిచ్చిన మరియను దేవుని తల్లి లేదా దేవమాత అని సగౌరముగా అంగీకరిస్తూ విశ్వాస నిర్దారణ చేశారు. దీనినే ఎఫేసుసు మహాసభ అని మన తిరుసభ పిలుస్తుంది. ఈ సభ  దేవుని తల్లి అన్న మాటను గ్రీకు భాషన థేయోటోకోస్ అని గంభీరంగా ప్రకటించబడింది. ఈ విశ్వాస ప్రకటన  మన కథోలిక సంప్రదాయంలో చిన్న భాగం.

ఈ గొప్ప థేయోటోకోస్ బిరుదుతో మరియ తల్లి ఇప్పటికీ ప్రపంచవ్యాప్తంగా అనేక మంది క్రైస్తవులచే గౌరవించబడుతోంది. ఆమె మాతృ సంరక్షణలో కొత్త సంవత్సర ప్రారంభమున మన ఆశలు  ప్రణాళికలను నెలకొల్పుకోవడానికి నేటి సాంఘిక పూజాబలి మనల్ని ఆహ్వానిస్తుంది. మన ఆందోళనలు మరియు మన యుగానికి సంబంధించిన సంఘర్షణలు, వెలుగు చూస్తున్న అన్యాయాలు మన ప్రపంచంలో శాంతిని మనము ఆమెకు అప్పగించవచ్చు.

తల్లి మరియ ప్రభువు దాసి. దేవుని కనికరంపై నమ్మకం ఉంచి, దేవుని మంచితనం ద్వారా నిలబడింది. వాస్తవానికి, ఆమె ప్రభువు ధన్యతను పొందుకున్నది. పాత నిబంధన హిబ్రూ భాషా పదం “అనావిమ్‌” అంటే యోహావాపై ఆధారపడు “దారిద్ర్యంలోని వారు” లేదా “కడు పేదవారు” అని అర్ధం. మరియ తల్లి దేవుని చేతిలోనే ప్రతిదీ ఉందని నమ్మకంగా విశ్వసించే వినయపూర్వకమైన దీనులందరిలో కల్లా ప్రత్యేకంగా నిలుస్తుంది (లూమెన్ జెంత్సియుం 55). పునీత అగస్టీను , "ఆమె తన కడుపులో యేసును గర్భం ధరించకముందే తన హృదయంలో గర్భం ధరించింది" అని అంటాడు, యోహాను సువార్త ఆమెను క్రీస్తు బహిరంగ జీవితం ప్రారంభంలో మరియు ముగింపులోను మాత్రమె చూపెడుతుంది. సువార్తికుడు యోహాను మాత్రమే కల్వరి వద్ద మరియ తల్లి ఉనికిని "యేసు శిలువ దగ్గర" (యోహా 19:25) వున్నట్లు గ్రంథస్తం చేసాడు.

యేసు చేసిన అద్భుతాలన్నీ చాలా మందికి భ్రమగా అనిపించినప్పటికీ, అతని తల్లి దేవుని శక్తిని విశ్వసిస్తూ అతని చివరి శ్వాస వరకు అతని చెంతనే మౌనంగా నిలబడింది. ఆమె విశ్వాసానికి ఆశ్చర్యపరిచే అద్భుతాలు మనకు అవసరం లేదు కానీ మన తండ్రి అయిన దేవుని మర్మమైన మార్గాలపై చిన్నపిల్లలకు కలిగిన నమ్మకంవలే ఆధారపడింది. యేసు యోహానుతో, “ఇదిగో నీ తల్లి” అంటూ తన  తల్లిని తనను అనుసరించే శిష్యులందరికీ మార్గదర్శక మూర్తిగా అనుగ్రహించాడు. ఆమె బలమైన మరియు సరళమైన విశ్వాసాన్ని మనతో పంచుకుంటుంది. మరియ తల్లి యేసు పుట్టిన సంఘటనలను అద్భుతంగా తన మదిన నిలుపుకున్నది. ఆమె తన హృదయంలో వాటిపై ధ్యానించింది. సర్వశక్తిమంతుడు తన కోసం మరియు ప్రజలందరికీ ఏమి చేసాడో ధ్యానించి౦ది. వినయపూర్వకమైన సాధారణ గొర్రెల కాపరులకు దూత, “ఈ రోజు దావీదు పట్టణంలో, మీకు రక్షకుడు జన్మించాడు. అతడు క్రీస్తు ప్రభువు” అన్న శుభవార్తను ఆమె తన హృదయంలో భద్రంగా పదిలపరచుకున్నది.

అదే సువార్త ఈరోజు మనకు ఇవ్వబడింది. మరయ తల్లి చేసినట్లుగా, దానిని నిధిగా పదిల పరచు కోవాడానికి, ధ్యానించడానికి మరియు దానికి ప్రతిస్పందించడానికి మనకు ఆహ్వానం అందించబడింది. ఈ రోజు, నూతన సంవత్సర ప్రారంభమున మనలో చాలా మంది మంచి తీర్మానాలు చేసుకోవడానికి ఇష్టపడే రోజు. దేవుని కృపకొరకు ప్రార్ధంచే ముందు మరియ వైఖరిని అవలంబించ కోరిక కంటే ఈ రోజు  నూతన సంవత్సర తీర్మానంలో మనం ఏమి కోరుకోగలం? ఈనాటి మన ఆరాధన మరియ తల్లి విస్మయ ఆశ్చర్య భావనలో పాలుపంచుకోవడానికి మనల్ని ఆహ్వానిస్తుంది. ఆమె కుమారుడు నిత్యుడైన క్రీస్తులో దేవుని దయగల ప్రేమ ముందు మనము కొత్త సంవత్సరం వైపు కనులెత్తి చూస్తున్నప్పుడు, కన్య మరియ ద్వారా సువార్తను నిధిగా పొందడానికి మనకు సహాయం చేయమని మరియ తల్లిని అడుగుదాము. తద్వారా క్రీస్తు తన తల్లి ద్వారా మన వద్దకు వచ్చినట్లుగా మన మధ్యస్థ ప్రార్ధన ద్వారా ఆతను ఇతరుల దరికి వస్తాడు. అన్ని రకాల సంతోష ధుఃఖాల మధ్య కొత్త సంవత్సరం 2025లో ఆశ్చర్య ఉత్కంఠలతో మరియు విశ్వాసంతో ప్రవేప్రవేశించుదాము.

 

“వాక్కు మరియ నుండి శరీరాన్ని తీసుకున్నప్పటికీ, త్రీత్వైకం పెరుగుదలలో గాని తగ్గుదలలో గాని మార్పు లేకుండా త్రిత్వంగానే ఉంటుంది. ఇది ఎప్పటికీ పరిపూర్ణమైనది” (Divine Office)