దేవుని రాజ్యం సమీపంలోనే ఉన్నది: దానియేలు 12:1-3; హెబ్రీ 10:11-14,18; మార్కు 13:24-32 (B 33)

 

దేవుని రాజ్యం సమీపంలోనే ఉన్నది

దానియేలు 12:1-3; హెబ్రీ 10:11-14,18; మార్కు 13:24-32 (B 33)

“సింహాసనం మీద కూర్చున్న మన దేవునికి మరియు గొర్రెపిల్లకు విజయం!” (Divine office)

ఈ ఆదివారం మన తిరుసభ ఆర్చన సంవత్సర కాలంలోని చివరి నుండి రెండవ ఆదివారం. ఈనాడు ప్రపంచ అంతం గురించి సువార్తలో యేసు చెప్పిన సూచనలను పరిశీలించమని మాతృ తిరుసభ మనల్ని ఆహ్వానిస్తోంది. నేటి సువార్త పఠనాన్ని పరిశీలించే ముందు దానిని గ్రంథస్తం గావించిన గ్రంథకర్త  జీవిత కాలంలోని రాజకీయ నేపథ్యాన్ని గమనించడం ముఖ్యం. యేసు తన మరణ పునఃరుత్థానములకు సుమారు  30 నుండి 40 సంవత్సరాల తర్వాత రోము నగరంలో లేదా రోము సమీపంలో నివసిస్తున్న క్రైస్తవుల కోసం సువార్తికుడు మార్కు తన సువార్తను వ్రాసాడు. అది రోమునగరంలో రాజకీయ గందరగోళ కాలం. నీరో చక్రవర్తి (క్రీ . శ. 64) పాలనలో కొంతమంది క్రైస్తవులు రోమను ప్రభుత్వంచే వేదహింసను అనుభవించారు. బరబ్బాసు వంటి యూదు విప్లవకారులు రోమన్లకు వ్యతిరేకంగా తిరుగుబాటు చేశారు. అదే  క్రీ . శ. 70 వ సం. లో రోమన్లు ​​జెరూసలేం ఆలయాన్ని నాశనం చేయడానికి కూడా దారితీసింది. ఈ రాజకీయ గందరగోళం మరియు వేద హింసల సమయంలో, యేసు ప్రవచించిన లోకాంత్య పరిమాణ వాస్తవానికి చాలా దగ్గరలో ఉన్నదని నాటి ఆదిమ క్రైస్తవ విశ్వాసులు భావించారు.

తిరుసభ అర్చనకాల సంవత్సరపు సువార్త అయినటువంటి మార్కు సువార్తపై మనం నిరంతరం శ్రద్ధ చూపీ వుండిన్నట్లయితే, ఆలయ విధ్వంసం, శిష్యరికంలో కలిగిన వ్యయ ప్రయాసలు మరియు అంత్యకాలంలో వచ్చే కష్టాల వంటి యేసు ప్రవచనాలను మనం బాగానే అర్ధం చేసుకొని యుండి వుంటాము.  తుది తీర్పుకు చివరి రోజు కోసం మెళకువగా ఉండవలసిన అవసరాన్ని గురించి యేసు తన శిష్యులకు బోధించడం మనం విన్నాము. యేసు మొదటి రాకడ ఒక రెస్క్యూ మిషన్ – అది మానవాళిని తన పాపం అనే బానిసత్వం నుండి విడిపించడం అయితే, అతని రెండవ రాకడలో అతని మిషన్ “అన్నిoటినీ క్రొత్తగా చేయడం” – అదే కొత్త స్వర్గం మరియు కొత్త భూమి – అనేది పూర్తి అవుతుంది. ఆ సమయంలో ఆతను మరణాన్ని ద్వంసం చేసి మన బలహీనమైన మత్స్యశరీరాలను అమరత్వానికి పునరుద్ధరిస్తాడు (దానియేలు 12:2-3 – 1 కొరింథి 15: 50).

నేటి సువార్తలో మనకు కనిపించే "ఆకాశ మేఘాలతో వస్తున్న మనుష్యకుమారుని" నిదర్శనం, ప్రవక్త దానియేలు (7:13-14) దర్శనం నుండి తీసుకోబడింది. దానియేలు పొందుకున్న దర్శనం యేసు తన రాచిరకపు శక్తి మరియు "అన్నిరకాల జాతులు, దేశాలు మరియు భాషలను" (దానియేలు 7:14) పాలించే అధికారం గురించి సూచిస్తుంది. అలాగునే నేటి సువార్తలోని ఉపమానం - అంజూరపు చెట్టు ఫలాలను ఇవ్వడం ప్రభువు అనుగ్రహానికి సంకేతమని యావేలు ప్రవక్త పేర్కొన్నాడు (యావేలు 2:22).  అంజూరపు చెట్టు ఫల భరితం అనేది కొత్త జీవితం, దాని ఆనందాన్ని మరియు దేవుని రాజ్యంలో శాంతి  ఆశీర్వాదాలతో కూడిన కొత్త యుగపు వాగ్దానాన్ని గురించి ముందే తెలియజేస్తున్న ఒక సూచన. అంజూరపు చెట్టు మొదటి ఫలాల సంకేతoవలె, దేవుని వాక్యాన్ని స్వీకరించే వారి హృదయాలలో దేవుని రాజ్యం "మొగ్గ" వలే మొదట ప్రారంభమవుతుంది. దేవుని వాక్యాన్ని నమ్మేవారు ఆయన రాజ్య ఫలాలను పొందుకుంటారు. ప్రభువు మహిమతో తిరిగి వచ్చే రోజు లేదా గంట మనకు తెలియదు! కానీ దానికి ముందుగానే ఇప్పుడు ఈ యుగంలో మనలో నివసిస్తున్న పవిత్రాత్మ, మనకు తన  ప్రేమ, శాంతి, సంతోషం, ఓర్పు, దయ, మంచితనం, విశ్వాసం, సౌమ్యత, ఆత్మనిగ్రహం వంటి వరాల కొత్త జీవితాన్ని మనం అనుభవిస్తున్నాము (గలతీ  5:22- 23; రోమా 14:17).

అయితే అంత్యకాల సమయం ఎప్పుడు వస్తుందో తండ్రికి తప్ప ఎవరికీ తెలియదని కూడా యేసు బోధిస్తున్నాడు. ఆతను "మహా శక్తితో మరియు మహిమతో మేఘాలలో వస్తాడు" (మార్కు 13:25-26). కాబట్టి, ఈ ముగింపు సమయం కోసం జాగ్రత్తగా ఉండమని ఆయన మనల్ని హెచ్చరిస్తూనే ఉన్నాడు!!! యేసు మాటలు మనలను భయపెట్టడానికి మాట్లాడలేదు. బదులుగా, ఆ అంత్య సమయాలకు మనలను సిద్ధం చేయడానికి మాత్రమే. ఆతని జీవపు మాటలు “ఆ భయంకర ఉగ్రపు రోజు” కొరకు మనలను సిద్ద పరుస్తున్నాయి. యేసు శాశ్వతమైన జీవపు మాటలు మరియు మనపట్ల దేవునికి కలిగిన అంతులేని ప్రేమలోనే మన ఓదార్పు మరియు నిరీక్షణ కలిగియున్నవి. ఆమేన్.

“మనుష్యకుమారుడు గొప్ప శక్తితో మరియు మహిమతో స్వర్గపు మేఘాలపై రావడం వారు చూస్తారు” (Divine Office)